الامومة تجربة غنية جدا جدا يا جماعة، تجربة مفعمة بالحياة، وفيها من كل حاجة كتير اوي، مليانة حب، مليانة خوف، مليانة قلق، مليانة تعب، مليانة احتمالات، فيها متعة فيها سعادة فيها شك وتأنيب وعدم تأكد.. تجربة فيها حاجات كتير اوي محتاجة تفكير وكلام ومناقشات وبحث وتعمق، مع ذلك في حالة من الصمت الرهيب.. صمت عن الحاجات اللي احنا بجد محتاجين نتكلم عنها، وعن الحاجات اللي الستات محتاجة تعرفها بمجرد ما جت في بالها فكرة انها تبقى ام
تجربة الامومة بكبرها ليها مدخل اسمه الحمل والولادة.. ليه انا سميته مدخل؟ لان هو اللي بيحدد تجربة امومتك كلها هتبقى عاملة ازاي، صحتك وصحة ولادك، وحياتكم بعد كدة، لان اللي ماحدش بيقولهولك رغم ان كل الناس عرفاه، انك مجرد ما دخلتي من الباب ده، انتي بقيتي انسانة تانية خالص.. هويتك كلها بتختلف، وجزء كبير من الهوية الجديدة دي بيحدده حالتك الصحية، لان دي هي اللي بتخلي التجربة كلها اما لطيفة جدا وسلسة فاللي جاي بعد كدة كله يبقى سهل، اما تكون صعبة جدا ومرهقة ومليئة بالالم والمخاطر فبالتالي اللي جاي بعدها كله غالبا بيبقى صعب
ممكن تحسوا ان انا مكبرة الموضوع شوية وبقول كلام اعمق من اللازم، ما كل الستات بتحمل وتولد عادي انتي لازم يعني تعمليلنا فيها فلوطة! وقد يكون معاكم حق، بس انا كان نفسي يبقى فيه فلوطة يقولي الكلام اللي انا بقولهولكم دلوقتي ده من ٨ سنين اول ما اخدت قرار الانجاب.. كان هيوفر عليا تجربة مؤلمة جدا جدا، كنت فيها على حافة الموت، بسبب حد اتعامل مع حملي باستهتار، الحمدلله ربنا نجاني، ولكن ده كلفني وكلف ابني كتير جدا، وخلى ايامي وسنواتي الاولى مع الامومة مؤلمة اكتر من ممتعة
انا قررت ابدأ مجموعة حلقات هنتكلم فيها عن صحة الأمهات.. من اول التخطيط للحمل، لحد الحمل بكل مراحله واجزاؤه، لحد الولادة والتعافي منها ومرحلة الرضاعة.. ازاي تعتني بنفسك وبطفلك في كل المراحل دي.. مش هنسيب حاجة كبيرة او صغيرة مش هنتكلم عنها، عشان انا نفسي مافيش اي واحدة تمر بتجربة شبه التجربة الصعبة اللي انا مريت بيها، وكل ام تقدر تستمتع بأمومتها.. الامومة كدة كدة صعبة، ومهما كانت سهلة هي كلها تحديات، فمش ناقصة تعقيد ومشاكل اكتر، عايزينها تكون سهلة ومريحة وبدون مضاعفات.. هو ده الهدف من السلسلة دي.. النهاردة هنتكلم عن فترة التخطيط والاستعداد للحمل
هطلب منكم رجاء خاص يا بنات.. ياريت كل حلقة جديدة تنزل من السلسلة دي تشاركيها مع صاحبتك اللي متجوزة جديد، اللي حامل، اللي على وش ولادة، اللي بترضع، اللي بتخطط لحمل جديد.. الشير مش هيكلفك حاجة بس ممكن اوي يجنبها مشاكل كتير
خلوني افكركم بسرعة ان حجز الاستشارات بيتم عن طريق الموقع الالكتروني او عن طريق رقم الواتساب الموجود في التعليق المثبت.. ماتنسوش تعملوا لايك وشير للحلقة، سبسكرايب للقناة لو انتو اول مرة تشوفوني ويلا بينا نبتدي
انا ندى حرفوش ودي قناة ويلبيينج
احنا عندنا ازمة كبيرة اوي في فكرة ان العادي واللي كل الناس بتعمله بشكل تلقائي، انا جربت اجيب بيبي، يلا هبقى حامل بكرة! ماعندناش ابدا ابدا ثقافة ان انا لازم يكون عندي خطة الهدف منها تأهيلي على الاقل جسمانيا اني اخوض تجربة صعبة جدا ومعقدة زي تجربة الحمل، ان فيه انسان يتخلق جوايا، وكل الحاجات اللي هو محتاجها عشان جسمه يتكون ويكبر لدرجة تسمحله يعيش هياخدها مني.. كل ست محتاجة فترة من التأهيل بتسبق تنفيذ قرار الحمل، الفترة دي بتختلف مدتها حسب ظروفك الصحية.. يعني لو انتي اصلا كويسة جدا سنك صغير ماعندكيش مشاكل صحية، اصلا نظامك صحي ماعندكيش نقص حاد في العناصر الغذائية المهمة، انتي محتاجة حوالي ٣ شهور، لو انتي تمام بردو وماعندكيش مشاكل لكن نظامك مش صحي بالمرة ودايما عندك مشاكل اللي بيتقال عليها المشاكل العادية دي اللي عند كل الناس، مشاكل في الهضم وآلام في الجسم وعندك انيميا وشعرك بيقع انتي محتاجة فترة تأهيل من ٦ لـ ٩ شهور.. اما لو عندك مشكلة صحية بقى عندك مرض مناعي عندك سكر فيبروميالجيا او غيرهم فانتي محتاجة فترة تتراوح من ٩ شهور ممكن توصل لسنتين، لان انا ماشجعش اي واحدة انها تاخد قرار الانجاب وهي اصلا صحتها تعبانة، انتي مش هتحملي ٩ شهور بس لا، دول ٩ شهور حمل يعقبهم ولادة، ثم سنتين رضاعة ولخبطة هرمونات، مافيش نوم وكل الحاجات اللي انتي عرفاها، فلو المعمعة دي بمشاكل اصلا مش محلولة، غالبا هتخرجي منها بمشاكل زيادة، المشاكل دي ممكن طفلك ينول حظ منها، فمن فضلكم خدوا وقتكم الكافي في الاعداد والتأهيل
طيب احنا هنمشي في السيناريو بتاع ان انتي ماعندكيش مشاكل كبيرة ولكن نظامك مش احسن حاجة ومحتاج تعديل وجسمك محتاج دعم، فانتي محتاجة مدة في المتوسط ٦ شهور.. اخدتي قرار الحمل، اول حاجة لازم تعمليها هي انك تعرفي وضعك الصحي الحقيقي.. ازاي؟ لازم تعملي عدد كبير من التحاليل المهمة جدا والضرورية عشان لو فيه اي مشكلة بتواجهك، او قد تواجهك اثناء الحمل تحليها او تاخدي خطوات استباقية.. زي ايه؟
اولا تحاليل الدم والحديد.. على الاقل خالص CBC - Ferritin - Serum Iron
٢- وظائف الكلى ووظائف الكبد - مهم جدا كمان تعملي urine analysis عشان تتأكدي ان ماعندكيش اي عدوى او التهاب في المسالك البولية لان دي مشكلة لو عندك مش هتقدري تحليها وانتي حامل بالعكس هتزيد وهتكون مزعجة جدا، لو اكتشفتي ان عندك المشكلة دي هتلاقي حلها في حلقة علاج التهاب المسالك البولية
٣- تحليل السكر التراكمي ومقاومة الأنسولين .. HbA1c - HOMA-IR - Fasting Insulin
٤- تحاليل الغدة الدرقية TSH - Free T3 - Free T4 - Anti-TPO
٥- تحاليل المناعة والالتهابات CRP - ESR - ANA - Antiphospholipid Antibodies
٦- تحاليل الجينات وسيولة الدم.. ودول ناس كتير جدا مابتعملهمش لو انتي ماعندكيش تاريخ مع الاجهاض او مشاكل سيولة الدم والجلطات، وهو ده اللي حصل معايا، لكن انا بشوف انهم اهم من كل اللي فات، عشان دول اللي ممكن يجنبوكي الكوارث والمضاعفات الخطيرة
Homocysteine ده اهم وادق وارخص حتى من تحليل MTHFR Gene Mutation
لان تحليل الهوموسيستين مش بيوضح بس وجود الطفرة، هو بيوضح تأثيرها الفعلي على آداء الجسم، والتغير فيه هو اللي بيوضحلنا لو فيه مشكلة اتحلت ولا لا، لكن التحليل الجيني بيأكد وجود الطفرة من عدمه فقط لاغير.. وهنتكلم في الموضوع بشكل مفصل اكتر
عندنا كمان تحليل Factor V Leiden Mutation .. هو ده التحليل اللي انا لو كنت عملته كان جنبني جلطة دماغية كادت ان تكون قاتلة، والدكتور مع الاسف مارضيش او كسل يطلبه مني في بداية الحمل لان ماكانش عندي مشاكل ولا اجهاضات سابقة، التحليل ده مهم جدا جدا جدا..
وتحليل Prothrombin Gene Mutation (F2 Mutation) ده بردو تحليل خاص بالطفرات اللي بتعمل مشاكل تجلط في الرحم والمشيمة وممكن تسبب اجهاضات متكررة
دي تقريبا اهم الفحوصات اللي لازم وضروري تكون كل نتايجها عندك قبل ما تقرري انك تاخدي خطوة الحمل.. ولو اي حاجة فيه ظهر ان فيها مشكلة لازم تبدأي تشتغلي على حلها وتكرري التحليل مرة تانية بعد 3 شهور
فيه حاجات عامة هتعمليها كدة كدة حتى لو كل تحاليلك كانت سليمة، الحاجات اللي كدة كدة هتعمليها زي مثلا انك.. تعدلي نظام اكلك.. طبعا هتشيلي من نظامك اي حاجة مصنعة او مثيرة للالتهاب، انسي الفاست فود، اكل الشارع، اللحوم المصنعة بأنواعها، السكر الابيض، المشروبات الغازية مشروبات الطاقة الجلوتين، كل الحاجات دي انسيها تماما
وفي نفس الوقت لازم تركزي جدا على الاكلات اللي قيمتها الغذائية عالية جدا.. البروتين الحيواني لازم تركزي عليه جدا، خصوصا البيف اورجانز اعضاء الحيوانات بأنواعها كبدة، قلب، كلى، مخ، حتى لو ماعندكيش ميزانية كبدة الفراخ كويسة جدا، الاسماك والسي فود مهم جدا، المحار لو تقدري، الاسماك الدهنية بأنواعها السلمون لو متاح، لو مش متاح عندك السردين رائع ومتوفر وسعره رخيص، المهم ماتروحيش تقليه في زيت نباتي
الدهون الصحية مهمة مهمة مهمة في المرحلة دي.. خصوصا الدهون الحيوانية شحوم الحيوانات، السمنة البلدي الزبدة زيت الزيتون الافوكادو زيت جوز الهند كل ده مهم.. النشويات اختاري المصادر النضيفة البطاطس، البطاطا الحلوة، الارز ابعدي عن الخبز والحلويات.. الخضار والسلطة مهمة لو ماعندكيش مشاكل في الهضم، لو عندك مشاكل في الهضم لازم تبدأي تشتغلي عليها وتحليها عندك عشرات الحلقات موجودين على القناة اتكلمنا فيهم عن كل مشاكل الجهاز الهضمي وحلها
نظمي اكلك.. يعني عدد وجبات معين وليكن ٣ وجبات مثلا هتاخديهم في ١٢ - ١٤ ساعة وباقي اليوم صيام عن الاكل طبعا ساعات الصيام دي من ضمنها ساعات النوم
في المرحلة دي الرياضة شيء اساسي حتى لو انتي ماكنتيش رياضية اصلا من قبل كدة.. مش معنى كدة انك لو مش رياضية هتروحي تتمرني بعشرة كيلو دامبلز فجأة.. لا بس مهم جدا تمارين التمدد والاطالة، هتدي جسمك قوة ومرونة هتدي مفاصلك الدعم المطلوب اثناء الحمل، وهتساعدك جدا في الولادة، وكمان تمارين الكارديو الخفيف انشالله حتى لو مشي، المهم تتحركي
النوم، عموما انتي من اول ما تحملي اي حد هيبص في وشك هيقولك نامي عشان مش هتشوفي النوم بعد كدة، طبعا هو احنا مش هنجتر النوم ده بعد كدة، لكن النوم مهم في المرحلة دي جدا عشان ده بيدعم عمليات الاصلاح والتجديد اللي جسمك محتاجها.. انتي محتاجة تنامي ٨ ساعات يوميا على الاقل
طيب بالنسبة للتحاليل اللي عملناها.. دي مهمة جدا عشان هتحدد حاجات كتير في جدول المكملات الغذائية اللي هتحتاجي تمشي عليه في الفترة دي..
جدولك هيبدأ بفيتامين د اكيد، دي كدة كدة مافيهاش كلام، وحتى لو حللتي والنسبة عندك كانت كويسة.. انتي محتاجة ١٠ الاف وحدة دولية يوميا من فيتامين د٣ مع ١٠٠ ميكروجرام من فيتامين ك٢
ومافيش حاجة اسمها واحدة بتخطط لحمل ومابتاخدش احماض دهنية اساسية.. ٢ جرام من احماض الاوميجا٣ EPA-DHA لحد كدة احنا بنتكلم للكل
تحاليل الدم والحديد لو ظهر فيها انيميا او فقر دم، هتبدأي تاخدي مكملات الحديد بصيغة Iron bisglycinate مش اي صيغة تانية ٢٥ مليجرام يوميا، ويفضل تاخدي معاه ٥٠٠ مليجرام من فيتامين سي هول فود المستخلص من الاطعمة الكاملة، لكن في حالة ماكانش عندك فقر دم، ماتاخديش حديد خالص، مكملات الحديد عند الحاجة فقط
تحاليل الكلى والكبد ضرورية، وحتى لو كانت سليمة لازم تدعمي الكلى والكبد حتى لو بكوباية شاي اعشاب كل يوم.. زي مثلا عشبة الاستراجالوش او القتاد الصيني لدعم الكبد، وعشبة الميلك سيثتل او حليب الشوك لدعم الكبد
لو ظهر عندك مقاومة انسولين او مقدمات سكري في التحاليل لازم ارقامك ترجع طبيعية قبل الحمل عشان ماتعرضيش نفسك لمشاكل سكر الحمل.. النظام اللي قولنا عليه في الاول لو طبقتيه هيساعدك جدا في ضبط سكر الدم بس ضيفي عليه مكملات myo-inositol وبربرين، لكن البربرين لازم يقف قبل الحمل، وبعد ٣ شهور عيدي تحاليل السكر ومقاومة الانسولين وراقبي التحسن.. طبعا الكلام ده بس للبنات اللي التحاليل بينت ان عندهم مشكلة مش للكل
تحاليل الغدة الدرقية ضرورية جدا جدا، لان بنات كتير بتكتشف ان عندها مشاكل في الغدة لما بيكونوا حوامل بالفعل، وده بيعرضهم وبيعرض الحمل لمشاكل كتير.. وعموما سواء اكتشفتي مشكلة في الغدة او الحمدلله طلعت سليمة.. لازم تدعمي الغدة الدرقية في المرحلة دي عن طريق ان اليود والسيلينيوم يكونوا جزء من جدولك اليومي.. اليود اما هتاخدي مكملات السي كلب، او مكملات اليود، والسيلينيوم هتاخدي حبتين من الجوز البرازيلي يوميا.. هسيبلك كل الحاجات اللي اتكلمت عنها في التعليق المثبت
طيب لو اكتشفت ان عندي مشكلة في الغدة؟ خمول، فرط نشاط، عقيدات او تضخم في الغدة الدرقية؟ اكتبي اسم مشكلتك في مربع البحث في يوتيوب واكتبي ندى حرفوش هتلاقي الحلقة اللي اتكلمنا فيها عن علاج المشكلة
طبعا تحاليل الالتهاب والمناعة مهمة جدا لان لو عندك مشكلة وانتي مش عارفة هتقدري تتعاملي معاها اسمها بكتير جدا ما تتعاملي معاها وانتي حامل.. وعموما يا بنات احنا بنتكلم في الحلقات دي عن الحمل والولادة في الحالات الطبيعية، لكن لو فيه مشكلة معينة انتو عايزين نتكلم عن طرق التعامل معاها اثناء الحمل اكتبولي في التعليقات، والموضوع اللي هتطلبوه كتير اكيد هنتكلم عنه
واخيرا تحاليل الجينات والتجلط.. ضروري ضروري ضروري تعمليها حتى لو ده اول حمل ليكي..
تحليل الهوموسيستين ضروري جدا لسببين، اولا الهوموسيستين المرتفع دليل على انك اكتر عرضة للجلطات، الهوموسيستين المرتفع لازم ينزل للارقام الطبيعية، وهنيجي للارقام الطبيعية دلوقتي
ثانيا لو مرتفع بيكون دليل على انك غالبا بتعاني من طفرة MTHFR ودي طفرة بتعيق عمليات الميثيليشن، باختصار شديد بتخلي الجسم مش قادر يحول فيتامينات ب. ب٦، ب٩، ب١٢ للصيغة النشطة اللي يقدر يستخدمها، والصيغ النشطة من الفيتامينات دي مهمة جدا لتكون الجنين وحمايته من التشوهات
فيتامين ب٩ ده اللي كل الحوامل بياخدوه في صورة الفوليك اسيد اللي هو الصيغة الغير نشطة.. انتي كدة كدة مش مفروض تاخدي كل الفيتامينات دي في صيغتها الغير نشطة لان الصيغة النشطة او المميثلة موجودة ومتوفرة في المكملات.. فانتي كدة كدة في المرحلة دي هتاخديهم، لكن لو الهوموسيستين عندك كان عالي فالجرعة بتزيد وبنرجع نكرر التحليل تاني بعد فترة عشان نتأكد ان الارقام رجعت طبيعية.. هقولك دلوقتي اسماء الصيغ والجرعات في كل حالة.. ولكن حاجة مهمة جدا تخلي بالك منها..
الارقام الطبيعية او المرجعية لتحليل الهوموسيستين غالبا بتكون بين ١٣ و١٥.. ده في الحالات العادية، لكن انتي في مرحلة الحمل والاستعداد للحمل بتحتاجي ترجعي لارقام اقل من كدة، كل ما قربتي من ٨ كل ما كان افضل
الصيغة النشطة من فيتامين ب٦ اسمها .. P5P .. لو ماعندكيش ارتفاع في الهوموسيستين هتكون جرعتك 25 mg ٣ مرات في الاسبوع .. اما لو فيه ارتفاع هتكون جرعتك 25 mg يوميا
الصيغة النشطة من فيتامين ب٩ اسمها.. 5-MTHF او methyl folate مش فوليك اسيد.. لو ماعندكيش ارتفاع في الهوموسيستين هتكون جرعتك 200–400 mcg .. اما لو فيه ارتفاع هتكون جرعتك 400–800 mcg
الصيغة النشطة من فيتامين ب١٢ هي Methyl-B12 مش Cyanocobalamin.. لو مافيش ارتفاع في الهوموسيستين جرعتك هتكون 1000 mcg من مرتين لتلاتة في الاسبوع، لكن لو فيه ارتفاع 1000 mcg يوميا
وهسيبلكم في التعليق المثبت مكمل واحد يكون بيجمع بين كل الصيغ النشطة
بقية تحاليل الجينات والتجلط لو اكتشفنا وجود مشاكل فيها بيكون ليها بروتوكول معين حسب نوع الطفرة .. لو عايزين نتكلم عن اهم مسيلات الدم الطبيعية الآمنة خلال الحمل والمناسبة لنوع الطفرة الجينية اكتبولي في التعليقات ممكن نعمل حلقة منفصلة عن الموضوع ده لان هيكون فيها تفاصيل كتير
حاجة كمان مهم جدا تهتمي بيها في مرحلة الاعداد للحمل، هي الديتوكس وفتح مسارات التخلص من السموم.. كل المعلومات عن الموضوع ده موجودة في الحلقة اللي هتظهر بعد شوية
ماتنسوش تعملوا لايك وشير للحلقة، سبسكرايب للقناة لو انتو اول مرة تشوفوني، ماتنسوش تبصوا على رابط وارقام حجز الاستشارات في التعليق المثبت وتبصوا كمان على رابط قناة المراجعات
